Flood Wahala:Gov Say “No Be Today Flood Dey Show Face”

Flood Wahala:Lagos State don vex say flooding no go turn every rainy season to wahala film again. Na why dem send Drainage Enforcement and Compliance Department waka go Lekki, Eti-Osa side on Friday, September 26. The mission clear — scatter any house wey dey block stormwater road for Ikota River alignment.

Dem talk say di work no be for show, na to make sure water dey flow like Wizkid lyrics anytime rain fall. People wey build house for where river suppose dey pass don hear am hot, because government say “enough is enough.”

E never too tey wey heavy rain knack Lagos scatter, flood don carry people chair, mattress and even cars do free swimming competition. Gov no wan repeat episode again.

Flood Wahala:Flood Turn Lekki to Venice Without Canoe

The kind flooding wey bin land Lagos last week make Lekki people dey wonder if na Italy dem dey. Many tenants see water pass their parlour step, even landlords no fit flex again. Cars park for road begin float like banana leaf, while some people dey use bucket dey chase fish comot from inside house.

The kain gbege even jam commuters wey dey waka their own. Imagine say you dress fine, wear white shoe, only for flood to turn am to brown shoe before you reach office. Lagos people no gree at all, dem say na government suppose prevent am.

Na why the enforcement waka carry muscle now, to clear all di illegal blocks wey turn Lekki to swimming pool every rainy season.

Flood Wahala:Na House Today, Na Market Tomorrow?

Flood Wahala:As demolition dey go on, some residents dey shout say government for pity dem, since na all their life savings dem don put inside the houses. But government dey para say human life dey more important than illegal block wey dey obstruct drainage.

Some observers dey joke say if Lagos no take time, water fit begin collect land rent from human beings. But with the way government dey move now, maybe rain no go show too much pepper again this year.

As one area boy yarn: “If your house dey for where fish dey chill, no vex when bulldozer knock gate. Rain no dey hear story.”