NUT Blow Whistle on minimum wage, Teachers Para—9 States Still Never Pay Teachers N70k

Na July 29, 2024, President Bola Tinubu sign the N70,000 minimum wage into law after National Assembly pass am sharp-sharp on July 23. But as we dey talk so, nine states still dey use “delay tactics” for teachers matter. Some of dem never even smell the new salary like Sunday jollof.

For Adamawa, dem jump from N18k go N30k wey Baba Buhari approve, but N70k? E still dey for dreamland. Meanwhile, teachers for FCT do strike wey pass 100 days—na when Area Council chairmen gree cut their IGR to pay dem small, na im strike quench small.

Ebonyi, Enugu and Gombe no dey carry last for this salary delay game too. Even though Enugu bin dash N50k as “enhanced wage award,” dem still never call the matter by its real name—minimum wage.

minimum wage: States Dey Find Excuse Like Na Election Period

Kaduna State carry excuse come say dem dey do teacher verification—na im make money never land. That one na like say person dey hungry and dem say “Make we check your ID first before you chop.” Nawa o!

Gombe say primary school teachers still dey wait for their own turn like NEPA queue. Nasarawa, Yobe and Zamfara? Na ghost mode dem enter, because up till now, teachers never see alert for the promised N70k.

NUT don vex. Dem say all these states suppose enter action mode immediately make e no be like say dem dey use teacher play politics. “Let everybody collect their share make belle rest,” na so dem talk am.

NUT Blow Whistle – No Be All Animals Equal for Education Sector

According to National Union of Teachers (NUT) oga Titus Amba, the wahala no be small. E talk say this kain inequality go spoil education delivery, as e dey divide teachers into those wey dey chop well and those wey still dey hustle like say minimum wage na lottery win.

Him yarn say “Make dem no dey use package deceive teachers. If you go pay, pay everybody.” According to am, na so dem go take build better education system wey go carry everybody along—no leave, no transfer.

For now, the question be say: na which state go first break the salary curse and which one go still dey use excuse do press-up?