Federal Polytechnic Bauchi Ramadan Wahala: School Threatens Instant Nikkah for Male & Female Students Weh Stand Together

Ramadan don start, but for Federal Polytechnic Bauchi, love birds no fit even stand side by side without fear of emergency wedding bell. Gbas Gbos don land as management drop serious circular wey scatter social media like harmattan fire.

Ramadan Rules: “No Standing as Couple” for Campus

For notification wey land on February 25, 2026, Federal Polytechnic Bauchi management talk say any male and female student wey dem catch standing together as “couple” during Ramadan go face serious consequence.

The Registrar and Secretary to Council, Alhaji Kamisu Salihu, sign the circular with bold warning. According to the memo, “During the Holy month of Ramadan, standing together in couple (boy & girl) is strictly prohibited.”

In short, if you dey campus and you see your guy or babe, abeg calculate your distance well-well. Because this one no be ordinary “shift small” — na full separation strategy.

“Instant Nikkah” Loading… If Dem Catch You

Now here come the real gbege. The circular no just stop for warning. E talk say if dem catch you and your “special adviser” standing too close, the school fit arrange immediate Nikkah for una.
Yes o! Emergency wedding package straight from campus management.

And make you no think say na free wedding rice you go chop. The memo clear am say the couple go sponsor their own Walima (wedding feast). So if you never budget for marriage, abeg no stand near anybody wey resemble spouse material.
Students don dey joke say: “I just come read Engineering, how I take jam Marriage 101?”

Social Media Drag Federal Polytechnic Bauchi: Nigerians React

As expected, social media no carry last. Many Nigerians blast the directive, talk say na federal institution and Nigeria suppose be secular country.

Critics argue say Federal Polytechnic Bauchi suppose focus on academics instead of relationship patrol. Some even ask whether standing beside person now don turn engagement ceremony.

Meanwhile, supporters say the rule na to maintain discipline and respect the holy month. But whether na discipline or matchmaking service, one thing sure — this Ramadan for Federal Polytechnic Bauchi no go dull.