United States Warn Nigerians Say ‘Pikin-Birth Visa Runs’ No Go Work Again – Visa Go Deny You Sharp Sharp

The United States (US) don raise alarm say dem don catch sense wey some people dey use arrange trip go Yankee just to born pikin wey go collect American passport. According to the United States Mission for Nigeria, any visa applicant wey dem suspect say na just to go born full citizen for there, dem go deny am visa straight.

Dem drop the warning for social media via their official X (Twitter) handle @USinNigeria. The post no smile at all – dem talk say if na belle you carry dey go Yankee, forget am, your visa no go smell approval. As dem put am: “Using your visa to travel for the primary purpose of giving birth in the United States… is not permitted.”

Visa Officers Don Get Radar – Belle Reason No Dey Pass Screening Again

This one no be joking sturv. US consular officers don activate detective mode. Dem say once dem suspect say your mission na to carry belle go born, e go be “access denied” for your visa. In fact, dem even drop flyer join with bold warning wey read like movie threat:
“We will deny your visa if we believe your primary purpose of travel is to give birth in the United States…”

Omo, this one na direct bullet for people wey dey run “birth tourism” package – especially the ones wey dey enter “Baby Passport Plug” business. US don signal say dem no dey laugh this matter again, dem wan protect their immigration rules like say na Super Bowl trophy.

VisaWiseTravelSmart or Go Sit Down for Naija Hospital

This whole move na part of US plan to tighten their visa wahala and make sure people no dey play smart with their immigration law. Dem say anybody wey wan go US suppose get better reason wey pass “na there I wan born make my pikin get blue passport.” In short, no more sharp guy package.

So if you dey plan say na United States you wan born your pikin make e blow from delivery room, better rethink. Uncle Sam dey watch, and your belle no go pass immigration radar if na passport you dey chase. Be wise, travel smart, no go jam embassy wall.
Question be: If US lock belle visa, where next the plug go dey?