Some Northerners no gree wait make body cold finish,Na less than 24 hours after news break say former President Muhammadu Buhari don waka go meet him ancestors,they don land street with full energy! People begin dance, beat drum, and shout like say dem win World Cup for daura and some other towns.
From videos wey trend online, some of dem even dey spray money while shouting “Buhari don yamutu!” as dem match round with loudspeakers and horses. For dem mind, na freedom finally land like NEPA light after one week of blackout. Na so the jubilation take scatter ground!
Even small pikin wey never chop breakfast dey wave broom and dey chant. One old mama talk say “Buhari time na suffer-head time,” and she thank God say the man don finally sign out. E clear say for many of dem, this one no be mourning – na thanksgiving service!
Some Northerners Vex Say Celebration Too Quick – “Abi Na Jazz?”
But no be everybody join the party o. Some elders for North don call the street party “highly disrespectful” say e no show any atom of African respect. One Alhaji even ask, “So we no go wait reach 3 days before una start to dance?”
Some northerners youths wey still believe in Buhari legacy call the celebration “Yahoo Yahoo joy” say na people wey no understand Buhari mission dey jubilate. “The man try for agriculture and security,” one youth yarn. Another person reply say, “Which security? Herdsmen still dey like mosquito.”
The matter don divide people pass JAMB cutoff mark. Online gbas gbos begin fly, as some dey support the celebration while others dey drag am like generator rope. One X (Twitter) user shout, “Una no get fear of God?”
From Hero to Wahala – Wetin Buhari Really Leave Behind?
Buhari enter power with plenty hope and “Change” slogan. But for many people, especially some northerners wey dey jubilate now, the change na from pot of soup to pot of nothing. From fuel wahala to naira palava, plenty Nigerians no feel the “next level.”
Even though some still give am credit for infrastructure projects like railway and Second Niger Bridge, many believe the hunger, insecurity, and economic gbege under him time wipe all those good tins commot from memory.
Now wey the man don go, the reactions don show say how person go be remembered dey different for eye wey see pepper and eye wey chop rice. Whether na celebration or silence, one thing clear: Buhari legacy go dey hot for debate for years to come.
Table of Contents
Discover more from OGM News NG
Subscribe to get the latest posts sent to your email.
