Nigerian Man: Once upon one jand love story, bros say na sweet love carry am come UK. According to am, the woman bin dey like angel when dem still dey Naija—omo, she dey cook, smile anyhow, dey behave like queen wey dey win Miss Decent every weekend.
But as dem reach obodo oyibo, the babe transform. Bros say e no understand again—she turn lioness, dey para for small thing, and even dey use Queen’s English take insult am.
“Na so she just change like NEPA light. From ‘baby, do you want eba?’ to ‘go and fix your own plate!’ Na so love take expire,” he yan.
Nigerian Man: She Carry Me Throway Like Old Nokia” – Bros Don Dey Sleep Bus Stop
Dem say when woman vex, even Satan dey ask for tutorial. Na so the woman one day just lock door, pursue am with slippers, and carry him Ghana-Must-Go throway outside. Just like film trick, bros find himself for cold street of UK, dey look sky dey ask God why.
“I no believe say na me be this—graduate of love, turn landlord of bus stop,” he talk. “If to say I know, I for dey my papa house for Warri dey chop starch and banga.”
The guy dey beg make anybody wey sabi better lawyer help am, because even him passport sef still dey under madam bed.
Nigerian Man: Lesson for Men Wey Wan Japa Because of Love
Bros use him story take give other guys sense. E say no be every ‘come baby’ wey you suppose follow reach Heathrow. Some women go change once plane touch ground. He even advise make men dey do background check like FBI before dem carry love matter enter immigration.
“If dem born you well, use sense. Naija bad, but cold floor for London bus stop worse. Love no dey sweet for under bridge,” he conclude.
Now, the guy dey plan return home, but e dey pray say village pipu no go use this one catch cruise. Meanwhile, UK breeze still dey slap him face every night, and him only hope na say karma go visit madam soon.
Table of Contents
Discover more from OGM News NG
Subscribe to get the latest posts sent to your email.
