Tobi Amusan Don Vex Say Team Nigeria Kit Na Nylon Bag Ahead World Athletics Championship

World record holder for women’s 100m hurdles, Tobi Amusan, don blast Team Nigeria kit arrangement ahead di 2025 World Athletics Championship wey go shelle for Tokyo, Japan. Just hours before di kick-off, Tobi Amusan drop video for Snapchat wey dey scatter table.

According to her, while other countries dey package their athletes with fine suitcases full of correct kit, Nigeria dey dash their own nylon bag like pepper soup takeaway. She talk say, “Dis country go just dey steadily embarrass person. Una wan make athletes nor switch allegiance? Una never ready. No singlet, nothing dey inside.”

Her rant don cause buzz online as Nigerians begin shake head say na same old story — poor planning, zero coordination, but plenty gra-gra.

Government Don Carry Last Again

Tobi Amusan no just dey vex for nylon bag alone; she accuse Nigerian sports federation of lack of professionalism. She say di thing don tire her because year after year, na same gbege. Athletes go train, suffer, sweat, only for government to disgrace dem last minute.

Other countries dey ginger their athletes with quality kits and motivation, but for Naija, dem go just do anyhow. Fans wey see di video talk say na real shame, because Amusan don dey represent Nigeria with pride for years, yet dem still dey treat am like roadside runner.

Some fans even joke say maybe government wan give athletes nylon bag so dem fit use am buy roasted corn for Japan. Humor aside, many agree say di treatment fit kill morale before race even start.

Jamaica Still Better Pass –Tobi Amusan Compare

Amusan still mention say Jamaican team sef get wahala, but e no reach Nigeria own. At least Jamaica dey provide something wey dey reasonable, but Nigeria own na clear case of “God dey.”

She warn say if government no step up, athletes go continue dey switch allegiance to countries wey value dem. She talk am plain: “Una no ready.” And true true, e be like say Nigeria no dey ready any year.

With di championship set to begin, Nigerians dey pray say Amusan and others go still shine despite di nylon kit disgrace. Because at di end, na only medals fit cover di shame wey government don already serve.