TikToker Shouts Say Police Grab Am for 30-Day Rant on Tinubu Gov’t – Gist Full Ground

One TikToker wey don dey use him mouth take fire Tinubu government for 30 days back-to-back don enter gbege as police allegedly nab am. E talk say dem detain am for hours because of him online ranting challenge, wey he use drag government left, right, and center.

According to am, he no even reach him house before some men in black show, carry am go station like say na VIP invitation. “I just dey waka jeje, na so dem bundle me enter van like say I be thief,” the TikToker talk. Him mata don scatter social media, as some pipu dey yarn say e don too talk, while others dey drag police say dem no fit take small criticism.

For station, dem allegedly hold am for hours, ask am wetin dey worry am wey e no fit rest. E say e try explain say na him own way of ‘constructive criticism,’ but dem no gree hear. “Dem talk say make I cool down, say no be like that dem dey run things for dis country,” he gist.

Social Media Pipu No Gree – “Na Freedom of Speech Be Dis?”

As e be now, social media don catch fire, pipu dey ask whether freedom of speech na only for decoration. Some dey hail am for having liver, say e get mind drag government for one full month. Others dey advise am say no be everything person suppose carry for head like gala seller.

“Abeg, e remain make dem add ‘Ranting’ join criminal offense for Nigeria law,” one Twitter user talk as e laugh. Some pipu dey argue say since government talk say dem go accept criticism, why dem dey arrest person wey just dey talk him mind?

Meanwhile, e get some pipu wey believe say the TikToker sef don too overdo. “My guy, 30 days dey drag government? Even landlord no go gree hear that kind complaint from tenant wey never pay rent,” one person drop for comment section.

TikToker: Police Dey Deny, But E No Clear

Police sef don come out talk say dem no arrest anybody because e criticize Tinubu government, say na normal security check dem do. But pipu no too believe the tori. “Make una dey play,” one person write under their statement.

According to dem, e get as the guy take behave wey make dem wan ask am some questions. “No be everything be oppression, sometimes, make we try understand say police work no easy,” one officer allegedly yarn.

For now, TikToker don dey waka free, but e still dey talk say na intimidation dem do am. Whether e go still continue him rant challenge or him go calm down, na another gist we go dey ppwait to see. Naija no dey carry last when e reach gbas gbos matter!