Port Harcourt : Woman Use Stone Kpai Him 60 years old Neighbor

One woman for Rivers State don enter serious gbege after she use stone take send her neighbor, one man wey dem sabi as Augustine, go meet him ancestors. The wahala happun for Railway area, Elekahia, Port Harcourt, on Wednesday afta dem get quarrel.
Tori wey reach our desk be say, Augustine just return from work for Trans-Amadi area for Port Harcourt, come siddon for front him house dey rest, when him female neighbor waka come accuse am say na him mess for backyard.
Baba Augustine vex, say how person wey don pass 60 go do dat kain thing when small pikin full compound? Na so talk turn argument, argument turn fight, before kasala burst.

From Quarrel to Fatal Blow For Port Harcourt

One of their neighbors, wey dem call Onyedikachi, yarn say na di woman first start wahala. She carry sand, pour am for Augustine body. Baba vex stand up, as dem dey drag matter, na so she pick stone knack am for head.
E talk say, “Di woman go behind di house see mess. She come ask di man if na him do am. Di man talk say him just come back from work, say no be small pikin dey compound? Na from dere wahala start.”
Neighbors wey dey watch di drama shock as di man kpai for ground. Dem rush am go hospital, but two hospitals no gree touch am. Na di third one confirm say baba don waka.

Police Don Carry Woman – She Dey Talk Another Tori

Police for Rivers State don confirm say dem don arrest di woman. But di woman dey talk another thing. According to Police Public Relations Officer, Grace Iringe-Koko, di woman claim say no be she knack Augustine with stone.
She talk say, “Di man hit am for nose, say him children follow dey throw stone for her side. As she dodge, na so stone take knack di man.”
But police no gree just leave di matter like dat. Investigation dey go on, and di woman go soon see judge for court for Port Harcourt . Gbas Gbos no good oo, make everybody calm down before wahala turn something wey person no fit handle!
Stay tuned for more tori from Gbas Gbos News!