Pet Café Dog Wahala: Owner Cry Out Say Customer Dey Intimidate Her After Grooming Wahala

Dog Wahala:Na wahala wey no get part two bust out for Lekki Exotic Pet Café, as Damilola Adeoti, the café owner, don raise alarm say one of her regular customers, Stephanie Henshaw, dey use power intimidate her after dog grooming waka turn to gbege.

According to Madam Adeoti, on April 17, 2025, Stephanie carry her dog, TY, come make dem give am fresh look. Dog waka go bathroom, come out fine, even collect am back alive and dey wag tail go house. But as film don dey twist, few hours later, dem return with sad face talk say the dog don kpai.
Before café people fit shout “how?”, story don carry leg reach police station. To make am worse, the dog no even do proper autopsy as dem rush go cremate am same night. Na so everybody dey confuse because nobody fit sabi wetin really kpai the dog for sure.

Dog Wahala:Police Station Roundabout & N20m Gbas Gbos

As if dog wahala no Dey enough, Adeoti talk say the whole thing later turn to marathon for police stations. From Maroko to Panti, even Zone 2 Onikan, she say she dey dragged like generator wey no gree start. According to her gist, Henshaw people dey pressure am to admit say she kpai the dog by mistake, plus to cough out apology up and down.

At one point, dem even carry one Terms of Settlement put for table: N20 million non-negotiable, plus one letter wey talk say she kill the dog. Adeoti say lai lai, she no fit sign wetin go stain her business and name. She insist say all the apologies wey she don give na just sympathy as fellow pet lover, no be confession.

Meanwhile, Adeoti cry out say her staff even chop small beating, café property scatter, and her mental health don dey shake like NEPA light. The Pet Café Lekki dog wahala kpai case no just affect her alone but scatter her business sales for almost five months.

As police rounds no gree favour Henshaw side, Adeoti talk say na then social media dragging begin. Negative reviews, bad mouth, and “dog killer” tags dey fly everywhere like Lagos traffic horn. She say all this online Dog Wahala don damage her café reputation, make her staff dey traumatized, and push her business near collapse.

No gree take last, Adeoti don file petition for Alagbon, wey cover assault, cyberbullying, threat to life, and defamation. But as if na Nollywood series, Henshaw and her family no gree tire, dem still drop counter-petition for Zone 2. Now na court and police still dey juggle the matter like football match wey never end.