Olori Eso Finally Enter Court – Lagos Most Wanted Assassin Dey Face 11-Count Wahala!”

Wasiu Akinwande, wey dem dey call Olori Eso — enter Ogba Magistrate Court like Christmas goat,Dem no dey play for Lagos again as police don finally drag one of the most feared men for inside Mushin —. This man na no be small fish o. Na full-blown killer whale wey don swim for Lagos street with blood-stained flipper for years.

Olori Eso, 44 years old and full of bad record, don dey face 11-count serious gbese from Lagos police. Dem accuse am say him no just be ordinary street boy, but confirmed hired assassin wey dey top wanted list like hit song. Even some of the people wey their loved ones don gbabgo because of am show face for court today, ready to point finger and yarn truth.

As dem bring Olori eso enter court this morning, everywhere quiet like mortuary. Even breeze no blow again. People wey gather say, “Na true o, na him be that devil wey wear agbada for Mushin.” Him face no show remorse — just dey look ground like say e dey find where to bury him own secret.

Na Operation “Silence, Speed & Surprise” Catch Am

You see this Lagos police, dem don finally wear sense this year. After many failed runs to catch this baddo, dem arrange better tactical squad with coded name — Operation Silence, Speed & Surprise. No be small James Bond level operation o.
Na for Agbado side of Ogun State dem finally catch the guy as he dey relax for him hideout dey chop cold indomie. CSP Benjamin Hundeyin, wey be Lagos Police PRO, yarn say dem no just catch am by mistake — dem track am like delivery man dey track jollof rice. After months of wahala, the guy finally enter one chance.

Wetin police find for him house na another season film. Na real armory dem uncover — 9 firearms, ammunition, dagger, magazines, international passports (e dey plan fly?), and even walkie-talkies like say him dey run small army inside Mushin. The guy no even deny am. He gree say na him dey use the tools do badness with him boys.

Olori Eso: Street Tension as Killer Don Enter Cage

Make nobody play o — Olori Eso no be small boy for street mata. According to police, na this guy dey run deadly gang for over 10 years. Armed robbery, murder, cult war, even kidnapping, na him menu. People wey dey Mushin no dey sleep with two eyes closed until dem hear say this guy don jam wahala.
Police call the Olori eso “the most dangerous killer in Lagos in recent time”, and say him arrest na big win for everybody wey dey hustle for street wey no want chop stray bullet. Residents don dey breathe small now say the person wey turn their area to war zone don finally dey answer roll call inside court.

Meanwhile, tension still dey as trial dey go. Family members of victims dey ready to testify and spill all the beans wey go make judge lock am up permanently. One woman talk say, “This man destroy my family. I wan see justice with my korokoro eye.”