Nigeria National Grid Don Fall Again: Whole Country Enter Darkness As Light Carry Leg Go Monday Afternoon

Nigeria don waka enter serious darkness again as national grid collapse on Monday afternoon, comot light for almost everywhere for country. As e be, homes, shops, offices and even some public places just siddon look generator like saviour.
According to load figures wey show around 3:12pm, power supply nearly disappear reach zero level nationwide. Na only small trace of light show face, and even that one no strong reach to write home about. Nigerians just dey ask the usual question: “Na today again?”

For Gbas Gbos matter, many people for social media don turn the blackout to joke, while others dey vex say the matter don tire pass laughter. As one person talk am, “Nigeria no dey lack darkness, na light we dey find.”

Nigeria National Grid: Only Abuja and Ibadan See Small Light, Others Collect Zero MW

Information from Distribution Companies (Discos) show say na only Ibadan Electricity Distribution Company (IBEDC) and Abuja Electricity Distribution Company (AEDC) manage see small power. IBEDC get about 30 megawatts (MW), while AEDC manage hold 20MW.

Every other Disco sharp-sharp record zero megawatts. Benin, Eko, Enugu, Ikeja, Jos, Kaduna, Kano, Port Harcourt and Yola — all of them enter full blackout mode, like say dem plug dem comot socket.

Altogether, total electricity wey reach Nigeria na just 50MW. For country wey suppose dey run on thousands of megawatts, this one na like using torchlight to light stadium. Businesses no happy, barbers vex, welders cry, and data sellers smile small.

Nigeria National Grid: Restoration Dey “Ongoing” As Nigerians Still Dey Wait Explanation

As Monday evening reach, report talk say effort dey to bring back the grid. But as e dey happen for Naija power matter, “ongoing” fit mean anytime from now till next market day.

Transmission Company of Nigeria (TCN) and Federal Ministry of Power never drop any official explanation on wetin cause the collapse or when light go fully return. This silence just add more pepper to people wey already dey sweat inside darkness.

Truth be say Nigeria National grid don dey collapse like biscuit for tea for recent years. Each collapse dey cause serious wahala for economy, businesses and daily life. As this latest one join list, Nigerians just dey hope say one day, light go stay and blackout go become breaking news instead of normal gist.