NDLEA Grab Lagos Pastor Wey Dem Say Na Big Boss for Cross-Border Dr¥g Runs – Gbas Gbos Full Gist

Na serious gbege burst for Okun Ajah side, Lekki, Lagos, on Sunday August 3, 2025, as NDLEA waka enter The Turn of Mercy Church like undercover ushers. Dem no come for altar call o – dem come for the man of God himself, Prophet Adefolusho Aanu Olasele, wey pipu sabi as Abbas Ajakaiye.

According to tori, NDLEA boys don dey pursue am since June, but e be like pastor get anointing for disappearing act – na so e don escape police hand two times before. This time, dem no gree. Dem come early like choir wey dey warm voice, sit down gidigba till evening service close, then gbam! Dem lock am as he dey waka commot from church like man wey just finish deliverance.

Pipu wey dey there talk say the scene be like Nollywood season finale – only say this one no get script. Worshippers shock, some dey speak in tongues, others dey record with phone. As one church member yarn, “Na only God fit judge, but NDLEA don pass judgement today.”

‘Ghana L%ud’ Be the Root of the Wahala

NDLEA tok say na big big consignment of one kain premium c@nnabis wey dem dey call “Ghana L%ud” cause the whole wahala. The first bust happen on June 4, 2025, when dem jam 200kg of the thing for Okun Ajah beach. Just when NDLEA dey reason say dem don cripple the operation, July 6 still show dem another 700kg wey dey inside delivery motor – and guess who dem link am to? Pastor himself.

This no be say person just waka go buy igbo for junction – we dey talk cross-border importation via waterways, from Ghana enter Naija. Na why NDLEA no smile at all, because this no be small street hustle, this na full-blown ‘international ministry’.

As NDLEA spokesman Femi Babafemi break am down: “Na months of surveillance, intelligence, and manhunt lead to this arrest. The suspect sabi the waterways pass fisherman.”

Pastor Confess, Ghana Escape No Work

After NDLEA don corner am, gist be say Pastor no even deny the matter. E yarn say na true, e dey move the package from Ghana enter Naija, and e even talk how e run go Ghana that time to dodge arrest after e escape twice. But this last escape plan no gel – NDLEA don turn am to blockbuster catch.

Sources talk say e use Ghana as hiding place, dey blend with local churches there, but NDLEA intelligence network don dey monitor am like CCTV since. Na so dem finally burst am inside im own church for Lagos – poetic justice or divine irony? You decide.

For now, NDLEA don carry am go cool off for cell while dem continue investigation. If to say na miracle, Pastor for don vanish again, but this one na NDLEA – dem no dey do altar call, dem dey do bail no go sure.