NDLEA Burst Ex-Convict Again: Cocaine Hide for Liquid Starch, UK Trip Scatter for MMIA

NDLEA don land another heavy gbas gbos for Murtala Muhammed International Airport, Ikeja, as dem catch 75 parcels of c@caine wey dem hide inside liquid starch sachets. The consignments dey factory-sealed, clean like say na normal cold-water starch, but inside na premium wahala dey wait UK.

According to NDLEA talk on Sunday, December 28, 2025, the intercepted dr¥gs weigh about 1.50 kilograms. The catch happen for export shed of MMIA, Lagos, just as the package dey ready to japa go United Kingdom. As e be, starch turn suspect, and airport scanner no gree sleep.

NDLEA officers yarn say dem don dey see many styles, but this one na “laundry gone wrong.” Instead of starch dey remove stain for cloth, e nearly stain Nigeria image for abroad—if not for sharp eyes.

Cargo Agents Fall for the Net

As investigation start, NDLEA grab three cargo agents wey dey process the shipment. The suspects na Jubrin Firdausi Hassana, Kuku Daniel Oluwasegun, and Igwe Chioma Jane. Dem arrest dem on Saturday, December 20, 2025, as dem dey arrange papers make the starch waka reach UK quietly.

From there, officers begin pull string, follow trail, and the whole movie start dey clear. NDLEA say the cargo agents no be the oga at the top; dem just dey do middleman work, while the real planner dey flex somewhere else.

This arrest show say NDLEA no dey only chase big fish; dem dey drag net well-well until everything inside come out—small, big, middle, all go show face.

Mastermind Caught on Date, Past Catch Catch Up

Further investigation later point finger give 37-year-old Nwobodo Chidiebere Basil as the brain behind the operation. NDLEA catch am on Sunday, December 21, for one popular relaxation spot in Ikeja—where man dey enjoy date with him girlfriend, unaware say law don book table for am.

As NDLEA criminal record show, Basil no be stranger to this kind business. For May 2023, dem arrest am after dem seize 30.10kg of methamphetamine wey dem hide inside powdered custard containers, also bound for London, same MMIA. Custard then, starch now—menu change, habit remain.

Court later sentence am to five years jail with option of ₦7 million fine plus one month community service, effective December 4, 2023. Basil pay the fine, waka free—but NDLEA say e no take long before man return back to old ways. This latest arrest just confirm say for dr¥g business, relapse dey quick pass detox.