E be like say breeze don blow, and fowl yansh don open for di mata wey dem carry go court against Lagos lawyer and writer, Dele Farotimi. Na so Nigeria Police Force waka enter court with one kain paper wey dem call “notice of discontinuance” for di defamation case wey Inspector General of Police, Kayode Egbetokun, bin carry go Federal High Court for Ado-Ekiti.
According to wetin Channels Television see, di police say na under di Administration of Criminal Justice Act, 2015 dem take withdraw di case. As e be so, di police prosecutor, one oga Samson Osobu, don sign di notice, say dem no wan do again because some big-big people wey sabi di mata don beg make dem free Dele.
Dele Farotimi: Court Don Talk Say “Case Don Finish,” Everybody Carry Go
When court open for di hearing, di prosecutor sharply tell di judge, Justice Babs Kuewumi, say police don tire for di case, so make dem comot am for court book. As e talk finish, Dele Farotimi lawyers no even gree argue. Dem just gbaladun dey observe di show.
Na so di judge yan say, “Since police say dem no wan do again, di case don end be dat. STRUCK OUT!” Just like that, wahala wey dem carry come disappear like NEPA light.
Outside di courtroom, Dele Farotimi senior lawyer, Adeyinka Olumide-Fusika, no too gree talk plenty, but e give small expo say dem don clear dis one, but another case still dey for Magistrate Court wey go show face again on February 13, 2025.
More Wahala Still Dey? Police Still Get Another Case for Ground!
Even as dis one don end for Federal High Court, e be like say another gbas gbos still dey cook. Police still get another case wey dem never withdraw for Magistrate Court, Ado-Ekiti. Dem never talk if dem go comot dat one too, but everybody dey reason say e fit follow dis one waka before di next court date.
Meanwhile, no be only police dey pursue Farotimi matter. Dem say e get civil cases wey still dey fly up and down for different courts for Abuja, Ogun, Oyo, and Rivers State. Some of di cases even get order wey dey warn am say make e no near di matter of di book wey e write, “Nigeria and its Criminal Justice System.”
As e be so, di legal gbas gbos never end, but for now, Dele Farotimi don get small fresh air to breathe. Di question now be: dem go still drag am again or di wahala don end finally? Na February 13 go determine di next chapter for dis tori.
Table of Contents
Discover more from OGM News NG
Subscribe to get the latest posts sent to your email.
