LASCOPA | Pipo Still Deh Use Plastic Rubber Inside Plantain Chips For Nigeria! Chop With Sense and Report Nonsense!!

LASCOPA – Gbas Gbos News | My people, make una shine una eye well well ooo! Some bad belle pipo still dey use plastic rubber mix with frying oil (ororo) to fry plantain chips for some parts of Naija. Dis kain nonsense first show face for 2024, but now e don dey spread like harmattan fire among greedy plantain chips sellers.

Wahala no dey ever finish for Lagos sef, as Lagos State Consumer Protection Agency (LASCOPA) don carry the matter put for head to warn everybody say make dem no chop danger for name of plantain chips! Dem talk say one kind bad behavior don enter market, and e fit affect our health.

Wetin happen? Eye witness carry picture go online show how one plantain chips seller allegedly put polythene (aka “Plastic rubber”) inside hot oil wey dem dey use fry the chips. Who chop dat kind chips go dey munch plastic rubber, no be plantain again! Na wetin dem put inside frying pot dey cause this gbege.
The agency don talk say dem go carry this mata for head like gala. Dem dey investigate how person go carry plastic rubber join plantain frying. LASCOPA warn everybody say this kind thing fit spoil health.

Health Palava: Why This Thing Serious

This matter no be joke o! Imagine say you dey chop sweet chips, and inside your belle, na rubber you dey digest. Experts don talk say frying food with rubber fit release dangerous chemicals inside una body. Dis chemicals no just cause stomach wahala; dem fit even cause serious sickness wey go land person for hospital or even worse.

LASCOPA say dem no go gree make anybody dey play with Lagosians’ health. Dem talk say make everybody shine eye for market. If you see any seller wey dey do abracadabra with food, no close mouth o. Report am quick! Na wetin go save another person life.

LASCOPA No Dey Sleep: How To Report Wahala Sellers

LASCOPA talk say dem headquarters dey for No 2B, Soji Adepegba Close, off Allen Avenue, Ikeja. But no worry if Ikeja far, dem get annex offices for Badagry Local Government Secretariat, Bariga LCDA, Ikorodu, and Ikoyi-Obalende LCDA. You fit waka go any of these places report case.

The agency even beg make Lagos people join hand with them. If you see seller wey dey do anyhow, snap picture, record video, or call their office. Together, we go fit pursue all these yeye sellers commot for market.
So, Lagosians, make we dey careful. Na rubber chips today; who know wetin go happen tomorrow? Chop with sense and report nonsense!