Ghana Police don reportedly arrest one self-acclaimed prophet wey dem dey call Ebo Noah, real name Evans Eshun, after him end-time prophecy fail land. Na social media carry the gist waka come out for December 31, 2025, as people begin ask question say, “So the world don end or we still dey?”
According to the report, na order from the Inspector-General of Police (IGP) carry the arrest waka, and na special Cyber Vetting Team handle the matter. As at the time of this report, police never drop official statement, but everybody finger dey point to the prophecy wey promise flood but deliver dry ground.
People online don already dey yarn say the arrest na result of public panic, online hype, and the way the prophecy trend pass Nollywood trailer without cinema release.
EbonNoah Ark Wey Never Sail: Flood Cancelled One Day Before D-Day
Ebo Noah don earlier tell followers say God send am message make e build ark to save humanity from serious global flood wey go happen on December 25, 2025. According to Ebo Noah, anybody wey believe suppose contact am sharp-sharp to secure seat for inside ark — no life jacket required.
But as Nigerians and Ghanaians wake up on December 25, no rain, no flood, no ark, just Christmas rice and soft drinks. One day before the supposed disaster, prophet come announce say God don change Him mind after fasting and prayer. Many followers just blink — others ask for refund.
Critics no waste time tag am content creator prophet, while memes flood social media pass the flood wey no come. From spiritual warning, the matter turn full-blown online gbas gbos.
Police Hunt, Radio Station Wahala & Final Capture
Before the final arrest, report say Elmina District Commander, Chief Superintendent Abraham Bansah, don order police on December 18, 2025, to locate and arrest Ebo Noah for questioning. That first attempt fail as prophet reportedly disappear like network during rain.
Police question him parents and neighbours, but the man location remain unknown. Matter cool small until one Benya FM radio presenter, Sofo Blessing, waka enter station on December 25 with one Liberian man, Paul Telly Jalloh, and the story burst again.
Na from there police allegedly restart serious manhunt, and this time, Ebo Noah no fit dodge destiny — or police — again. As investigation dey continue, Ghanaians just dey ask one simple question: na prophecy be this or premium content gone wrong?
Table of Contents
Discover more from OGM News NG
Subscribe to get the latest posts sent to your email.
