Gbas Gbos for Rivers State: Tinubu Suspend Gov Fubara, Put Navy Soja as Oga Patapata

Na so everywhere scatter for Rivers State as Presido Bola Tinubu vex declare state of emergency. As e take be, di wahala wey don dey brew for di state don too much, wey make oga presido no fit siddon look. Him talk say di katakata for security and politics don pass be careful, so e no get choice but to sideline Govnor Siminalayi Fubara, him deputy Ngozi Odu, plus di whole state assembly dem for six months.

Na during national speech e take drop di gbas gbos, talk say e no go gree make militants dey run things dey spoil pipeline wey dey give Nigeria money. E say di local government people just dey look dey do nothing, so federal government gats step in before e too late.

Navy Baba, Vice Admiral Ibok-Ete Ekwe Ibas, Carry Rivers State for Head

To bring back order and make sure say tins no go scatter pass dis level, Tinubu don put retired Navy Oga, Vice Admiral Ibok-Ete Ekwe Ibas, as di interim administrator of Rivers State. Dis baba sabi wetin e dey do because him don serve well well for Nigerian Navy.
Dis Ibas wey dem born for 1960 for Cross River State don waka enter Nigerian Defence Academy for 1979, and by 1983, dem don make am Sub-Lieutenant. Na di same man wey be Chief of Naval Staff from 2015 go reach 2021. E get experience to handle wahala, and na im federal government dey hope say go fit rearrange Rivers State.

Di Wahala Wey Lead to Dis Emergency Palava

For di past months, Rivers State don turn gbas gbos center, as political wahala dey boil for inside di PDP camp. Dem even dey reason to impeach Govnor Fubara and e deputy. As if dat one no do, militants no wan gree, dem dey scatter oil pipeline up and down, especially di Trans Niger Pipeline.
Presido Tinubu don try gather di South-South political leaders talk sense into dem, but e be like say everybody just dey do ear like say dem no hear. Since e no see better change, na so e carry im presidential hammer drop state of emergency sharp sharp.

Wetin Dis One Mean for Rivers State People?

As federal government take over di state, e mean say all di political tori go dey under Abuja control for now. But dem say judiciary go still dey run as e suppose be, so make nobody fear say dem go lose their fundamental rights.
Tinubu don already send di matter go National Assembly make dem stamp am, so di aim na to fit balance di security issue and stop Rivers State from turning to war zone.

Di Koko for Rivers State: People Wey Dey Happy & People Wey No Like Am

As e be, di announcement don cause kasala for Nigeria. Some people dey clap say e good as di federal government don step in before tin spoil pass. Oil money too dey involved, so dem believe say di move go help protect Nigeria’s economy.
But some other people dey vex, say na wayo move, say e fit affect democracy for di kontri. Opposition sef dey para say Tinubu no suppose remove elected leaders just like dat. Dem dey ask say why dem no try settle di mata in a more peaceful way.

Fubara Tenure & Di K-leg Wey E Don Carry Come

Pipo wey dey criticize Gov Fubara say him don use him hand cause some of di wahala wey lead to dis emergency.
E present 2024 budget to only some small group for State Assembly, wey Supreme Court vex say na ‘executive recklessness’.

Di local government election for October 5, 2024, na violence and rigging full am, Supreme Court sef cancel am.
Political gbege for PDP make am no fit even enter State House of Assembly dey do him work.
Militant dem dey tear pipeline anyhow, but state government no do anything to stop dem.

Wetin Go Happen Next?

Now wey Vice Admiral Ibas don take over, Rivers State go enter new level of governance.
E go join body with security forces make dem chase militants comot.
E go rearrange di government system make everything dey work well.
E go work with judiciary make sure say law and order still dey ground.
As e be, na di next six months go show whether dis Tinubu intervention go work or e go add more wahala. Rivers people go dey wait make dem see how e go be, whether na beta change or na another gbas gbos go land.