Gbas Gbos for Ogun State: Court Don Order Hanging for Three People Wey Kill Entire Family

Gbas gbos don finally land for three people wey commit wickedness wey pass Nollywood film. Ogun State High Court for Kobape, Abeokuta, don sentence Lekan Adekanbi, Ahmed Odetola, and Waheed Adeniyi to death by hanging because dem finish Kehinde Fatinoye, him wife Bukola, and their pikin Oreoluwa for January 1, 2023.

The matter start when the family return from crossover service, only for their own driver, Adekanbi, to lead two agbayas go attack dem for their Ibara GRA house Ogun State around 2am. No be only say dem kill the couple, dem still burn their house join, just to make sure say wahala go full ground.

Pikin Wey No Do Dem Anything, Dem Still Carry Am Go River

If you think say e don finish, e never start! After dem finish the papa and mama, dem no gree leave their pikin Oreoluwa and one adopted son. Na so dem tie the two boys like goat and waka go Ogun River for Ogun State. As e be, Oreoluwa no make am, but the adopted son run escape like film trick.
When dem later catch Adekanbi, the man open mouth confess say na because dem no increase him salary or give am loan make e buy okada. So na why e go do family pack elimination? Wetin human being no go hear for this world?

Drama Inside Police Cell: Criminal Wey Do Disappear And Reappear

No be only the crime bad, the guy even try do magic escape from police hand. As dem lock Adekanbi, e fake say e sick for cell. Police, wey no sabi say wahala dey cook, rush am go hospital. My people, as dem still dey check am, baba jump from bed, fly go fence, and disappear!
But na who be who? Police do some James Bond investigation, track am go Iseyin for Oyo State, but before dem reach, e don japa again. Dem later use better intelligence package bundle am back for Ogun State Abeokuta by January 21, 2023. Odetola and Adeniyi sef no go free, as dem nab dem for Ogere on February 9, 2023.

Judge No Dey Smile: “Make Dem Hang Till Dem Go”

The judge, Justice Basirat Adebowale, no even gree hear “pim!” She talk say the prosecution don prove say the three men na correct criminals wey no suppose see daylight again.
She deliver judgment like thunder, say: “You, Adekanbi, Odetola, and Adeniyi, for killing papa, mama, and pikin, no deserve mercy. Make dem hang una till una go!” She come even add, “May God have mercy on your souls,” like say e go help dem.

Na so justice take land, as wahala finally catch people wey think say dem sabi pass everybody. Other accomplices wey help hide Adekanbi and sell stolen things sef collect their own jail time. My people, e be like say crime no really pay after all!

Extra Wahala: Family Members and Welder Collect Their Own Share for Ogun State Court

As the court hammer still dey hot, e no just end for the three main criminals. Other people wey put hand inside the wahala no waka free at all. Temitope Fadairo, wey be Adekanbi wife, collect two years imprisonment because she hide her husband like say e be lost treasure.
Adekanbi mama, Adenike Adekanbi, sef enter one-year imprisonment for lying give police anyhow. Meanwhile, Azeez Usman, the welder wey dismantle the stolen motor, collect better 14 years imprisonment because e go touch wetin no concern am.

Anuoluwapo Owolaja no dodge punishment as she sef collect two years inside. But for Abass Odetola and Lukmon Adewusi, dem manage waka free because court say dem no get hand for the matter.
Na for Ogun State High Court for Kobape, Abeokuta, dem drop this heavy judgment for Monday, and everybody wey hear the matter just dey shake head say wahala no dey finish!