Ganduje Don Step Down, Prof Yilwatda Na the New APC Oga Patapata

Professor Nentawe Yilwatda don take over from Ganduje wey step down because of “health reasons”Gbas Gbos land again for inside APC as dem new chairman don enter office like new landlord. (some people still dey side-eye that gist). Na for secret midnight meeting for Abuja, where oga Tinubu and APC governors gather, dem select Yilwatda as the chosen one.

The man no be small pikin o. Yilwatda na former lecturer, na minister of humanitarian affairs currently, and he still run for Plateau State governor for 2023 elections. The man dey 56 and na real brainbox, according to people wey sabi am.

The official handover go soon happen sharp sharp as the party National Executive Committee go still rubber-stamp the matter. But as e be now, the chairmanship baton don already change hand.

Zoning Formula and Small Christian Touch Join for the Package

This APC politics no be by accident—na proper chess game. According to dem zoning arrangement, the chairmanship na North-Central turn, and that one cover places like Plateau, Benue, Kwara, Kogi, Nasarawa, and Niger. So Yilwatda tick dat box perfectly like say na JAMB question.

Wetin make e sweeter na say dem say the man be Christian. With President and Vice-President already be Muslims, the party wan balance the spiritual table small. Dem say this move go make sense wella for unity and religious balance. You sabi Nigerians now—if the religion no balance, wahala dey knock.

One inside source yarn say, “Make una no look this man like newbie o. Him head correct, and him hands still clean like new bucket.”

APC Wan Repackage, Yilwatda Go Be Face of the Rebranding

Dem no just pick this Prof for fun. APC dey try clean their name like say na white handkerchief. After all the gbas gbos and wahala wey don trail them since last election, dem need person wey people go trust—and Yilwatda na the man dem hope go deliver.

One APC big man talk say, “This Prof na young man wey no dey drag for EFCC news. Him record still clean, and he dey make sense when he talk.”

Nigerians don tire for old story, so maybe, just maybe, this new appointment fit shine small light for inside APC matter. But sha, make we dey observe from gallery—politics get as e be.