FCT High Court Grant Ngige Bail for Alleged N2.2 Billion Fr@ud Case, EFCC Still Hold Strong Conditions

FCT High Court don yarn say former Labour Minister, Chris Ngige, fit collect bail for the alleged N2.2 billion fr@ud case wey EFCC carry come. Justice Maryam Hassan drop the ruling on Thursday, but make am clear say this bail no be “waka comot sharp sharp” kind.

According to court, Ngige must bring one correct surety wey be federal government director. No be area boy director o — person wey get confirmed position and property for inside FCT with valid Certificate of Occupancy (C of O).FCT high Court even talk say make dem deposit the property papers for court, no story.

Until all these conditions balance well, Oga Ngige go still dey Kuje Correctional Centre, dey count ceiling fan and dey wait for paperwork to clear.

EFCC Gbas Gbos: N2.2bn Wahala and NSITF Contract Palava

EFCC no come court with small file. Dem arraign Ngige last Friday with eight-count charge, including alleged money laundering, ab¥se of office, and contract fr@ud reach N2.2 billion. All this one na from him time as supervising minister of NSITF between 2015 and 2023.

Anti-graft agency still talk say Ngige approve seven NSITF contracts for consultancy, training and supply services, wey total money reach N366,470,920.68. EFCC allege say some of these contracts get serious question mark, plus allegation of collecting gifts from contractors.

As e stand so, Ngige enter dock, hear all the charges and calmly talk “I no guilty.” Court record am, pen no break.

Bail Battle: Health Grounds, Passport Story and FCT High Court Conditions

For Ngige side, his lawyer, Patrick Ikwueto (SAN), beg court say make dem grant bail on health grounds. He assure judge say his client no go run, no go hide, and no go touch evidence — say this one na gentleman case.

But EFCC lawyer, Sylvanus Tahir (SAN), no gree at all. He remind court say Ngige travel go abroad for medical treatment in October and no return him international passport as required. When dem re-arrest am, Ngige say passport don “lost” — story wey EFCC no find funny.

Despite the back-and-forth, FCT high court still grant bail but with hard-core conditions. Message clear: bail dey, but freedom still get price. As the case dey move, Nigerians dey watch to see whether this one go end for full trial or another long legal marathon.