Ebonyi Bishop:Na big gbege don burst for Ebonyi as police don arrest one popular man of God, Bishop Ndibueze Okorie Onyagoziri, wey be the General Overseer of Champion the Truth Cathedral. Dem say the bishop allegedly use “divine healing” take do another kind miracle for one 22-year-old lady wey dey fight sickle cell.
According to tori wey reach Gbas Gbos News, the Ebonyi bishop tell the girl say e fit change her genotype from SS to AA if she go through “spiritual deliverance” for seven days—na so the girl gree begin the miracle session. But instead of healing, the whole thing na wahala upon wahala as her health come worse pass before.
The matter burst open when the girl yarn say she no feel again and confess give her sister. Na so gist fly reach police hand. Next thing, oga bishop don land for Abakaliki Police Headquarters like “Miracle Don Expire”!
Ebonyi Bishop:Police Don Carry the Bishop Go Station
Ebonyi State Police Command no even waste time. Dem grab Bishop Ndibueze on Wednesday, October 1, 2025, and carry am go headquarters sharp-sharp. The Police PRO, DSP Joshua Ukandu, confirm say the man of God dey their custody as dem dey still dig the matter well.
“Yes, the bishop dey with us,” the PPRO talk. “We still dey investigate the case. E get as e be, but the man go explain wetin really happen.”
Na so dem park the “miracle worker” enter station, leave only the church members dey shout “God no go shame us!” Meanwhile, online people no gree rest — dem don dey ask whether Holy Spirit fit change genotype or na only DNA lab fit do am?
Ebonyi Bishop:‘SS to AA’ Miracle Wey No Work
For one video wey don scatter internet, the victim explain say she begin live with the Ebonyi bishop because of her health wahala. Her family even agree make she stay for church to get divine healing. But na there the “healing” turn to “bed ministry.”
The girl talk say the Ebonyi bishop assure her say if she do seven days “special prayer” (wey come mean seven nights of bed work), her genotype go change from SS to AA. Because she don lose three of her siblings to the same sickness, the poor girl agree — hope say miracle go happen.
But after the seven-day “crusade,” nothing change. In fact, her body come weak more. Na there she shout give her sister, wey rush talk am out. Now, the so-called “spiritual doctor” dey for police net, while Nigerians dey reason whether miracle now dey get genotype section too.
Table of Contents
Discover more from OGM News NG
Subscribe to get the latest posts sent to your email.
