Chief for Osun Allegedly Force Corn Thief Drink Poison – Papa of Victim kpai from Shock

Osun State Police don confirm say dem don arrest one big chief for Ipetu-Ijesa, Chief Ajibade Gbenga, wey be Ejimo of the town. Dem say the oga chief allegedly force one 25-year-old boy, Ebenezer, drink poison because the guy allegedly thief two corn from im farm. Na for Ireti Ayo area of Ilesa the gbege happen last week.

As gist enter town, police tok say dem don start investigation. The wahala no end for there o – Ebenezer papa hear say im pikin don kpai from poison, the shock hold am tight like NEPA bill, the man come collapse and waka go meet ancestors. Meanwhile, Ebenezer wey drink the poison still dey alive as doctor for Wesley Guild Hospital don neutralise the chemical for im body.

The story even sweet pass Nollywood as one video wey Osun journalist, Isaac Haastrup, post show the chief hold cutlass like village hunter, before force the boy drink wetin suppose send am go early grave. Na so gbege start.

From Farm to Hospital – How Corn Nearly Send Two People Go Heaven

Dem say the boy waka enter chief farm, help himself with two corn like say na buffet, but as chief catch am, na another chapter begin. According to police tori, the man beat the boy well-well, mix one strange liquid wey no be zobo, then use senior power force am drink.
Luckily for Ebenezer, some correct people for the area no gree watch film end like that. Dem rush am go hospital sharp-sharp, and doctors show say e no be yet im time. Corn no fit kill am that day.

But as dem dey battle to save Ebenezer life, one person wey no sabi keep mouth waka go tell im papa say, “Your pikin don drink poison, he don kpai.” The papa shock no be here. Before anybody fit talk say “Police is your friend,” the man don fall and no wake up again.

Police Don Carry Chief Go Osogbo Osun– Investigation Still Dey

Police spokesperson, Abiodun Ojelabi, confirm say na 62-year-old Chief Ajibade be the suspect. Ojelabi tok: “The boy allegedly thief two corn. Chief catch am, beat am, mix substance and force am drink. But good people rush am hospital, now the boy dey stable.”
The matter don pass village level as police carry the chief from him hometown Ipetu-Ijesa go Osogbo Osun for proper investigation. The whole community still dey yarn about how ordinary corn cause two families serious pain.

For now, na only police sabi how this case go end, but e don clear say corn fit cause war if you no ask before you pluck.