Borno State Don Spend ₦2.6 Billion Pampering “Repentant” Boko Haram, But Soldiers Dey Para Say Info Dey Leak Go Back to Camp

Na wah o! According to Borno State 2025 third-quarter budget gist, dem don drop ₦2.6 billion on what dem call “livelihood support for repentant Boko Haram members” from January reach September. If you check am well, ₦758.1 million fly out just between July and September alone — e be like say the “repentance” get installment payment plan.

Meanwhile, health sector wey suppose dey take care of people wey Boko Haram don wound finish no too enjoy love like that. Primary Healthcare Development Board manage collect ₦2.076 billion out of ₦8.7 billion, while the Hospitals Management Board chop only ₦1.2 billion from ₦10.5 billion wey dem budget for am. Meaning say hospital dey survive on hope and drip water, while dem dey fatten ex-insurgents with empowerment package.

Borno State government dey talk say all this na part of peace process, but people for street dey ask, “Na peace we dey buy or new wahala we dey sponsor?” Because e be like say the repentance dey sweet too much pass national cake.

Soldiers Don Vex: “Repentants” Dey Leak Our Secret Like DSTV Subscription

Wahala burst when some soldiers for Yobe and Borno State yarn give SaharaReporters say these “repentant” bros no too pure like government dey talk. According to dem, some of these newly baptized “ex-fighters” still dey do “under G” waka with their old commanders.

One soldier talk say dem dey leak sensitive info — things like troop movement, camp routine between 4pm to 7pm, armoury location, and even alarm points. Imagine soldier wey risk him life for front line, only for ex-Boko Haram wey dem just give empowerment to tell terrorist where dem dey hide grenade and RPG. Na real life version of “Enemy Within.”

Dem say the wahala don reach level wey troop morale dey shake. “How we go dey fight people wey sabi our password?” one officer para. “You no fit dey fight ghost wey get your map.”

Attacks Still Full Ground,Borno State Governor Zulum Don Cry Out Again

Even with all the “repentance package” wey government dey share like palliative, attacks still dey happen back-to-back. Reports talk say the same sects wey don supposedly “repent” still dey strike for some areas. Na why Governor Babagana Zulum don raise alarm say Boko Haram don begin regroup again near Lake Chad and Mandara Hills.

Zulum talk say for the past three years, Borno don receive over 300,000 repentants — but as the number dey rise, the gunshots no dey reduce. He don beg Federal Government make dem send more soldiers, drones, anti-drone gadgets, and better air support make the region no turn action film location.

As e be, Borno matter don turn one kind paradox — billions don go for “repentance,” but the same people wey repent dey still dey test the microphone for night. Nigerians dey ask: “Who go repent from spending money on people wey no dey repent well?”