Anambra Widow Cry Out as In-Laws Allegedly Chase Her & Children, Demolish House After Husband kpai

One Anambra widow, Madam Vivian Eze-Onwumere heartbreaking drama dey unfold for Anambra State as she don cry come out say her in-laws don chase her and her children commot house after her husband, Philimon, kpai on December 17, 2023. According to her, na her late husband brother, Isaiah, and his children, especially one guy wey dem dey call Ebuka, dey lead the oppression.

She talk say even though dem do traditional marriage proper for Nsukka and family people attend, dem still deny say she be the real wife. To make matter worse, dem even talk say the children no be her late husband own — na that one pain her pass.

As if grief never do her, these same people wey no show face when the man dey sick or contribute anything, suddenly turn land agent just ten days after burial. Dem wan sell the land sharp sharp, and Madam Vivian say lai lai, she no go gree. She run go Ministry of Land go block the sale with caveat before dem chop the inheritance finish.

Land Wahala Turn House Demolition — Widow Return to See Her Load for Rain Like Abandoned Mattress

The gbege reach final level on July 4 when Madam Vivian come back from market, only to see say her load dey outside, soaked under heavy rain like say she be refugee. The house wey she dey stay with her children? Dem don break am down like old biscuit.

She say dem claim say court order dey, but she never see even pure water version of that court paper. “Everything I struggle for with my husband, they just throw it away like say we be strangers,” she cry.

Now, the woman dey beg Anambra State Governor, Prof. Charles Soludo and him madam to help before everything finish. She dey fight not just for herself, but for the children wey her late husband leave behind — children wey her in-laws dey reject like expired sardine.

Village Court No Be Supreme Court — Na Justice Nigerians Dey Call For Now

This kind matter wey suppose be family talk don turn public disgrace. Nigerians don dey talk say e high time government and human rights groups begin take widow matter serious. If woman wey support husband till the last day go chop this kind treatment, wetin remain for society?

Dem say na the same in-laws wey no show face for hospital or burial ceremony, na dem now dey turn landlord and developer. Madam Vivian talk say only her and the man elder brother, Christian, try care for Philimon when sickness show face. Now, na people wey no drop shishi dey throw weight around.

If to say justice dey work well for this country, this kind matter no suppose even reach demolition level. Na clear example of how some families dey maltreat widows once their husband close eye.