Nigeria politics don enter another level as Senator suggest make president sit down for one long 16-year term. E be like say election wahala don tire some people o!
“Election Don Dey Distract Governance!” – Senator Kenneth Eze Yarn
Senator Kenneth Eze wey dey represent APC for Ebonyi and chair Senate Committee on Information and National Orientation don drop serious proposal. According to am, Nigeria suppose comot from the normal two-term, four-year presidential system wey dey inside the 1999 Constitution, come adopt one single 16-year presidential tenure.
The senator talk this one for him house for Ohigbo-Amagu, Ezza South LGA on Monday. Him say every four years, government dey press pause because everybody don enter campaign mood. Before you know am, third year don reach, and na re-election matter dey chop full attention. Projects go just dey hang like NEPA wire wey no get light.
According to am, na this constant campaign wahala dey make plenty projects no finish and policies no grow well well. Him believe say governance need steady head, no be “start and stop” style every election season.
16-Year Single Term: Better For Power, Agriculture & Infrastructure?
Senator Kenneth say if president get one straight 16-year tenure, e go remove election pressure from the table. That way, leader fit focus on serious long-term development for sectors like power supply, infrastructure, agriculture, and fiscal policy.
Him talk say projects like irrigation schemes, mechanized farming, and energy reform no be something wey you fit rush cook like Indomie. E need time, planning, and continuity to bring real result. According to am, if leader no dey think about next election, e go think about next generation instead.
The senator insist say this proposal no be attack on democracy. Instead, e be like invitation to national conversation on constitutional reform. Him say Nigeria need open debate where everybody go drop opinion before any change fit happen.
National Dialogue & Civic Responsibility: “No Be Policy Alone Go Save Us”
Even as Senator Kenneth dey push for 16-year presidential term, him still remind Nigerians say policy change alone no fit perform miracle. According to am, citizens too get role to play for national development.
Him call on journalists, teachers, civil servants, parents, and even students make dem promote civic responsibility and national values. Him believe say if people no change mindset, even 30-year tenure no go solve Nigeria problem.
Now the big question be: Nigerians go gree give one president 16 solid years? Or dem go say four plus four still dey okay? One thing sure — this proposal don spark fresh gbas gbos for political space.
Table of Contents
Discover more from OGM News NG
Subscribe to get the latest posts sent to your email.
